Հայաստանյան աշխատաշուկան գտնվում է Տեղեկատվական տեխնոլոգիաների անմիջական ազդեցության գոտում։ Այսինքն ՏՏ ոլորտն ու գործատուները ինչ-որ առումով թելադրում են համընդհանուր աշխատաշուկայի զարգացման ուղին։ Սա մի կողմից շատ լավ է մեր երկրի համար, քանի որ ունենք ներուժ և համաշխարհային շուկա, սակայն մյուս կողմից անելիքներ ու խնդիրներ դեռ առկա են։ ՏՏ ոլորտը շատ գրավիչ է իր աշխատավարձերի, սոցիալական փաթեթների և աշխատավայրի ձևաչափի առումով։ Այս գործոնների ազդեցության տակ շատ քիչ երիտասարդներ են ցանկանում զբաղվել գիտությամբ, վերջինիս ոչ-այդքան գրավիչ լինելու պատճառով։
ՏՏ ոլորտի դինամիկ աճը որոշ առումով դժվարացնում է ավելի տրադիցիոն ոլորտներում, ինչպիսին է օրինակ Ֆինանսաբանկային ոլորտը, հավաքագրման գործընթացը։ Եթե 10-15 տարի առաջ համալսարանների շրջանավարտները և արտերկրում ուսանած երիտասարդները ձգտում էին աշխատել Բանկային կամ Խորհրդատվական ոլորտներում, այսօր նախընտրում են ՏՏ-ն։ Շոշափելի տոկոսային կշիռ ունի նաև այլ մասնագիտություններից դեպի ՏՏ ոլորտ մասնագետների հոսքը։
Տեխնոլոգիաների ոլորտում փորձառու մասնագետների սղության և նախագծերի քանակի դինամիկ աճի տեմպերը ստիպում են արհեստականորեն բարձրացնել Ծրագրավորման և ՏՏ ոլորտի այլ մասնագետների աշխատավարձերը, հաճախ, միևնույն ընկերությունում հանգեցնելով ՏՏ և ոչ-ՏՏ մասնագետների վարձատրությունների շոշափելի տարբերության։
Մյուս կողմից ՏՏ ոլորտի ազդեցության շնորհիվ վերջին 5-10 տարիների ընթացքում զգացվում են շոշափելի դրական փոփոխություններ այլ ոլորտների գործատուների մոտ։ Օրինակ՝ կադրային մասնագետից մարդկային ռեսուրսների մասնագետ անցումը, աշխատավայրի ձևաչափի փոփոխությունը, աշխատանքում Agile մոտեցման կիրառումը, և այդ դրական ազդեցության դրսևորումներից ընդամենը մի քանիսն են։
2020-2022-ի առաջին եռամսյակ ՏՏ ոլորտը շարունակում է դինամիկ զարգացումը՝ ստեղծելով նոր աշխատատեղեր, իսկ ընկերությունները կշարունակեն մնալ առաջնորդի դերում, ակտիվությունը աճեցնելով մոտ 4-6 տոկոսային կետով։
Զարգացման նման համատեքստում մարզային քաղաքների ակտիվությունն ու ներգրավվածությունը 7-8% տեսակարար կշռի սահմաններում է։ Մարզային ակտիվության աճը անմիջականորեն կապված է Հայաստանում աշխատաշուկայի թվայնացման հետ և ցանկացած մեծ փոփոխություն այդ ոլորտում կհանգեցնի նաև մարզային քաղաքների ակտիվության աճին։
Հնարավոր է փոփոխություն ամենապահանջված մասնագիտությունների համատեքստում, սակայն Ծրագրավորման և Վաճառքի ու սպասարկման ոլորտի մասնագիտությունները կրկին աճ կապահովեն նաև 2022 թվականից հետո, հաշվի առնելով ՏՏ և Ներկրում/Արտահանում/Առևտուր ոլորտների ակտիվությունը։
Ծրագրավորման մասնագետների պահանջարկի հետ կաճի նաև դեֆիցիտը, նման իրավիճակ կլինի նաև Թվային մարքեթինգի, Տվյալագիտության (Data Science), Պրոդուկտի զարգացման, Նախագծերի զարգացման և չորրորդ ինդուստրիալ հեղափոխության արդյունքում առաջացած մասնագիտությունների դեպքում։
Աշխատավարձերի համատեքստում․ ՏՏ ոլորտում կշարունակվի դինամիկ աճը, կախված՝ Հայաստան նոր ընկերությունների մուտքով բարձրացումը կարող է տատանվել 10-22% միջակայքում։ Աշխատավարձի բարձրացում կդիտվի վաճառքի այն մասնագետների մոտ, որոնք հիմնականում աշխատում են տեխնոլոգիական ոլորտում։ 5-8,5% աճ կդիտվի նաև մարքեթինգի ոլորտում։
Սոֆթ հմտությունները կշարունակեն կարևորության աճի տեմպը 2022-ից հետո նույնպես։ Որոշ մասնագիտությունների դեպքում կհանդիսանան էական գործոններ աշխատանքի լավ կատարման հարցում։
Հաշվի առնելով աշխարհում արագ զարգացող տեխնոաշխարհը, Հայաստանի ազգային պելիտեխնիկական համալսարանը’ որպես ոլորտի միակ կրթական կառույց, ներդրել է ժամանակակից կրթական նորարար մոդելներ, հետագայում ուսանողներին ապահովելով ոչ միայն լիարժեք կրթություն, այլև կայուն և բարձր վարձատրություն: