Ծնվել է 1945 թվականի օգոստոսի 5-ին Երևանում, ազգությամբ հայ։
Կրթությունը․ 1963թ․ ավարտել է Երևանի Մ․Գորկու անվ․ միջնակարգ դպրոցը, Ոսկե մեդալով:
1963-1968 թթ․ Երևանի Կ․Մարքսի անվ․ պոլիտեխնիկական ինստիտուտ (ԵրՊԻ), Տեխնիկական կիբեռնետիկայի ֆակուլտետ, «Ավտոմատացում և հեռուստամեխանիկա» մասնագիտություն, ավարտել է գերազանցության դիպլոմով, եղել է Լենինյան թոշակառու։
1970-74 թթ․ ԽՍՀՄ Գիտությունների ակադեմիայի «Տեղեկատվության հաղորդման պրոբլեմների ինստիտուտ (ИППИ)», ստաժյոր, ասպիրանտ (Մոսկվա):
1977-78 թթ․ երկարաժամկետ գիտական ստաժավորում ԱՄՆ-ի UCLA (University of California at Los-Angeles) համալսարանում ( IREX ծրագիր )։
1981-82 թթ․ Կիևի պետական համալսարան` արտասահման դասախոսական աշխատանքի մեկնող մասնագետների մեկամյա կուրսեր, ավարտել է գերազանցության դիպլոմով:
1999-2000 թթ․ եռամսյա գիտական ստաժավորում Աթենքի ազգային տեխնիկական համալսարանում (NTUA), NATO Science ծրագիր։
Թվարկվածից բացի, Հայաստանում և արտասահմանում անցել է բազմաթիվ տարաժամկետ և տարաբնույթ այլ ստաժավորումներ և վերապատրաստումներ:
Աշխատանքային գործունեությունը սկսել է 1968 թվականից՝ ԵրՊԻ-ի «Ավտոմատացում և հեռուստամեխանիկա» ամբիոնում, որպես երիտասարդ մասնագետ (ուսումնական վարպետ, ասիստենտ), անցնելով երկար ճանապարհ մինչև պրոռեկտոր, ռեկտորի պաշտոնակատար:
1973-75 թթ․ Մոսկվա՝ ԽՍՀՄ Գիտությունների ակադեմիայի «Տեղեկատվության հաղորդման պրոբլեմների ինստիտուտ, (ИППИ)», ինժեներ-հետազոտող։
1975-1980 թթ․ ԵրՊԻ, «Հաշվողական տեխնիկա» ապա «Ալգորիթմական լեզուներ և ծրագրավորում» ամբիոնների ասիստենտ, ավագ դասախոս:
1980թ․ – առ այսօր` ներքին համատեղությամբ, ԵրՊԻ, ՀՊՃՀ (այժմ ՀԱՊՀ) «Ալգորիթմական լեզուներ և ծրագրավորում» ամբիոնի դոցենտ:
1979-1989 թթ․ ԵրՊԻ «Հաշվողական տեխնիկա» նորաստեղծ ֆակուլտետի դեկանի տեղակալ (ֆակուլտետի հիմնադրման առաջին իսկ օրվանից)։
1990-1996 թթ․ ԵրՊԻ (հետագայում` ՀՊՃՀ) «Հաշվողական տեխնիկա» ֆակուլտետի դեկան։
1996-2003 թթ․ ՀՊՃՀ «Հաշվողական տեխնիկա» ֆակուլտետի իրավաժառանգորդ «Քոմփյութերային համակարգեր և ինֆորմատիկա» դեպարտամենտի վարիչ։
2003-2020 (հունիս) թթ․ ՀՊՃՀ (ներկայիս՝ ՀԱՊՀ), ըստ հաջորդականության՝ Ընդհանուր կըրթության և օտարերկրյա քաղաքացիների ուսուցման, Ուսումնական աշխատանքների, Միջազգային համագործակցության և զարգացման ծրագրերի, Միջազգային համագործակցության և կրթական բարեփոխումների գծով պրոռեկտոր:
2020 – 2021թթ․ ռեկտորի ժամանակավոր պաշտոնակատար։
2021թ․- առ այսօր՝ ՀԱՊՀ նորաստեղծ «Թվային տեխնոլոգիաներ» ուսումնահետազոտական կենտրոնի ղեկավար:
1975 թվականին՝ ԽՍՀՄ Գիտությունների ակադեմիայի «Կառավարման պրոբլեմների ինստիտուտում, ИПУ» (Մոսկվա) հաջողությամբ պաշտպանել է թեկնածուական թեզը, ստանալով տեխնիկական գիտությունների թեկնածուի գիտական աստիճան:
1978 թվականին` ԽՍՀՄ Բարձրագույն որակավորումների հանձնաժողովի (Մոսկվա) կողմից շնորհվել է դոցենտի գիտական կոչում։
Գիտական հետաքրքրությունների շրջանակը ներառում է` կառավարման և վերահսկման մեխանիզմները կենսաբժշկական համակարգերում, մաթեմատիկական մոդելավորման, պատկերների մշակման և ճանաչման ալգորիթմներ, ՏՏ կիրառումներ։ Վերջին երկու տասնամյակում առաջնահերթությունն անցել է ստրատեգիական պլանավորման, կրթական նոր տեխնոլոգիաների ներդրման, կրթական բարեփոխումների և բուհի միջազգայնացման ոլորտներ:
Հեղինակ է 140-ից ավելի աշխատանքների (գիտական հոդվածներ և զեկուցումներ, հաշվետվություններ և վերլուծականներ, ուսումնական ձեռնարկներ, մեթոդական ուղեցույցեր և այլն)` հրատարակված Հայաստանում, Ռուսաստանում և արտասահմանյան այլ երկրներում:
Հայաստանի և Միջազգային ինժիներական ակադեմիաների իսկական անդամ է։ Հանդիսացել և հանդիսանում է մի շարք մասնագիտական և հասարակական խորհուրդների, հանձնաժողովների և հանձնախմբերի անդամ/նախագահ:
Արժանացել է մի շարք բարձր պարգևների և խրախուսանքների՝ «Անանիա Շիրակացի» մեդալ, ՀՀ Նախագահի շնորհակալագիր, ՀՀ Վարչապետի հուշամեդալ, ՀՀ ԿԳ նախարարության, ՀՊՃՀ, ԵՊՀ, Մոսկվայի Բաումանի անվան պետական տեխնիկական համալսարանի «Ոսկե հուշամեդալ»-ներ, ՀԱՊՀ Վաստակագիր, Միջազգային ինժիներական ակադեմիայի «Պատվավոր դիպլոմ», Երևանում «Ռուսաստանյան գիտության և մշակույթի կենտրոնի», Ռուսաստանի Դաշնության Տամբովի մարզի նահանգապետի շնորհակալագրեր և այլն։
Ամուսնացած է, ունի երկու երեխա։