Պոլիտեխնիկը և Յունիբանկը կնքեցին համագործակցության հուշագիր

Պոլիտեխնիկը և Յունիբանկը կնքեցին համագործակցության հուշագիր

Ս․թ․ դեկտեմբերի 27-ին Հայաստանի ազգային պոլիտեխնիկական համալսարանի ռեկտոր Գոռ Վարդանյանը և «Յունիբանկ» ԲԲԸ գլխավոր վարչության նախագահ Մեսրոպ Հակոբյանը կնքեցին համագործակցության հուշագիր:

Հուշագրի կնքման արարողությանը ներկա էին ՀԱՊՀ պրոռեկտոր, աշխատակազմի ղեկավար Էլբակ Էլբակյանը, Կրթական ծրագրերի և ուսումնամեթոդական աշխատանքների գծով պրոռեկտոր Մարինկա Բաղդասարյանը, Միջազգային համագործակցության և կրթական բարեփոխումների գծով պրոռեկտոր Սարգիս Ասատրյանցը, Գիտության և գիտատեխնոլոգիական համագործակցության գծով պրոռեկտոր Արեգ Գրիգորյանը, Տնտեսական գործունեության և ենթակառուցվածքների սպասարկման գծով պրոռեկտոր Կարապետ Թոռչյանը, ինստիտուտների տնօրեններ, դեկաններ, դասախոսներ, ուսանողներ։

Հուշագրի նպատակն է երկու հաստատությունների միջև ձևավորել համագործակցության առավել արդյունավետ ձևաչափ՝ կրթական ծրագրերի կատարելագործման և գործարար մակարդակում դրանց կիրառման նպատակով։

ՀԱՊՀ ռեկտոր Գ․ Վարդանյանը նշեց, որ Պոլիտեխնիկական համալսարանը կարևորում է համագործակցության մեջ գործատուների ակտիվ մասնակցությունը։ «Այսօր նոր որակի համագործակցության հիմք է դրվելու և այդ համագործակցությունն ուղղված է լինելու համապատասխան կրթական ծրագրերով որակի էական փոփոխությանը, նոր ենթակառուցվածի, մասնավորապես թվային բանկային գործի որակյալ կրթության համար անհրաժեշտ լաբորատորիայի ապահովմանը, ուսանողների համար նպատակային վճարովի պրակտիկաների կազմակերպմանը, ինչպես նաև բանկի մասնագետների հետ ուսումնական պլանների ձևավորմանը, ուսումնական գործում ոլորտային ժամանակակից գրականության ապահովմանը, տարբեր մասնագիտությունների անձանց վերաորակավորմանը և կարճաժամկետ դասընթացների միջոցով բանկի կադրային կազմի համալրմանը»,-նշեց ռեկտորը։

Գոռ Վարդանյան

Հայաստանի ազգային պոլիտեխնիկական համալսարանի ռեկտոր

 

«Յունիբանկ» ԲԲԸ գլխավոր վարչության նախագահ Մ․ Հակոբյանը նշեց, որ բանկն արդեն որոշակի համագործակցության նախագծեր ունեցել է համալսարանի հետ, որոնք հաջող ընթացք են ունեցել։ Ըստ նրա Պոլիտեխնիկական համալսարանը հենց այն բուհն է, որի հետ համագործակցությունը թույլ կտա բանկին սահուն անցնել դեպի թվայնացում տանող ճանապարհը։ «21-րդ դարում դասական բանկերը գնում են թվայնացման ուղղությամբ և այս համատեքստում Պոլիտեխնիկական համալսարանի հետ մեր համագործակցությունը ունենալու է իր արդյունավետությունը։ Այսօր կարիք կա, ոչ միայն մասնագիտական գիտելիքների, այլև նեղ մասնագիտական վերապատրաստման դասընթացների, ինչպես սկզբնական աշխատանքի, այնպես էլ արդեն գործող աշխատակիցների կամ բուհերի շրջանավարտների համար, որոնք ցանկանում են նոր կոմպետենցիաներ ստանալ։ Հենց այստեղ էլ մենք համագործակցելու ենք ինչպես թեորետիկ մասում, այնպես էլ լաբորատոր մասի ստեղծման գործում, որպեսզի մասնագետները ծանոթ լինեն պրակտիկ գիտելիքների, որոնք թույլ կտան արագ ինտեգրվել բանկային կյանքին։»,- նշեց Մ․ Հակոբյանը։

Մեսրոպ Հակոբյան

«Յունիբանկ» ԲԲԸ գլխավոր վարչության նախագահ

 

«Յունիբանկ»-ը «Թվային բանկային գործ» կրթական ծրագրով կարճաժամկետ և երկարաժամկետ որակյալ ուսուցման համար Պոլիտեխնիկական համալսարանում կստեղծի լաբորատորիա՝ հագեցած ժամանակակից թվային գործիքակազմով և լիցենզավորված ծրագրերով, ինչպես նաև կֆինանսավորի բուհի 3 մասնաշենքերի նախագծերի նախնական դիզայնի և հայեցակարգի մշակման աշխատանքների իրականացումը։

Հուշագրի մեկ այլ կետի համաձայն՝ բանկը կաջակցի «Տեղեկատվական համակարգեր» կրթական ծրագրի մշակման և իրականացման գործընթացին։ Զուգահեռ կկազմակերպվեն ուսանողների վճարովի պրակտիկաներ։

Նախատեսվում է նաև, որ «Յունիբանկ»-ը ուսանողների համար կապահովի հանդիպումներ բիզնեսի տարբեր ոլորտներում կայացած հաջողակ գործարարների հետ, անձնական փորձը ուսանողներին ներկայացնելու նպատակով։ Թեստավորման և հարցազրույցների արդյունքում՝ լավագույն ուսանողները կապահովեն աշխատանքով՝ «Յունիբանկ»-ում կամ բանկի գործընկեր կազմակերպություններում։

 

Հիշեցնենք, որ դեռևս 2019 թվականին Պոլիտեխնիկական մանկապարտեզը ստացավ իր առաջին մեծ նվիրատվությունը։ ՀԱՊՀ մանկապարտեզի կարիքների համար «Յունիբանկ»-ը (հանձին վարչության նախագահ՝ Մեսրոպ Հակոբյանի) կատարեց անհատույց նվիրատվություն, համալսարանին փոխանցելով մանուկները համար նախատեսված շուրջ 90 մանկական մահճակալ, ներքնակ, ավելի քան 120 հանդերձապահարան։