Վահե Վազգենի Բունիաթյանը ծնվել է 1947 թվականի հոկտեմբերի 1-ին Սպիտակ քաղաքում: 1965 թվականին ավարտել է տեղի թիվ 1 միջնակարգ դպրոցը: 1965 թվականին ընդունվել է Երևանի պոլիտեխնիկական ինստիտուտ:1970 թվականին ավարտել է ԵրՊԻ-ի Կիբեռնետիկայի ֆակուլտետը: 1970-1973 թվականներին...
Միկրո և նանո էլեկտրոնիկա
Լաբորատորիայի ղեկավար
Հիմնադրվել է 2011թ. հունվարի 1-ին։
Հետազոտությունները նվիրված են կիսահաղորդչային և ֆերոէլեկտրական կերամիկական ու բարակ թաղանթային կառուցվածքների ստացման տեխնոլոգիայի մշակմանը, այդ տարրային հենքի վրա գերբարձր հաճախականային պասիվ տարրերի, կենսաբժշկական, կենսաքիմիական, բնապահպանական նոր տվիչների պատրաստմանը, դրանց բնութագրերի տեսական ու փորձարարական հետազոտմանը, մոդելավորմանը, ինչպես նաև պինդ օքսիդային այրման խցիկների կերամիկական մեմբրանների ու էլեկտրոդների ստացման տեխնոլոգիայի մշակմանը: Բազային լաբորատորիայում իրականացվող հետազոտությունների շրջանակը և հետագա զարգացումների միտումները համահունչ են նաև Հայաստանի Հանրապետությունում գերակա համարվող՝ բարձր տեխնոլոգիաների ներդրման և զարգացման գիտական ուղղությունների հետ: Իրենց առանձնահատուկ իդիէլեկտրիկական, պիեզոէլեկտրական, պիրոէլեկտրիկական, էլեկտրաօպտիկական հատկությունների շնորհիվ, ֆերոէլեկտրական կերամիկական և բարակ թաղանթային կառուցվածքները վերջերս մեծ ուշադրության են արժանացել որպես գերբարձր հաճախականային շղթաների, միկրոէլեկտրոնային սխեմաների, քիմիական ու կենսաբժշկական տարբեր միջավայրերի տվիչների բաղկացուցիչ բաղադրիչներ: Ակտիվ հետազոտություններ են կատարվում դրանք նաև դինամիկական օպերատիվ հիշողության, էներգաանկախ ֆերոէլեկտրական օպերատիվ հիշողության սարքերի, ֆերոէլեկտրական դաշտային տրանզիստորների, լարումով կառավարվող կոնդենսատորների, գազային (CO, էթանոլի, ացետոնի և այլն), H2O2-ի, հեղուկ միջավայրերի pH-ի և այլ իոնների նկատմամբ զգայնություն ցուցաբերող ֆերոէլեկտրական փականով դաշտային տրանզիստորների ստեղծման ուղղությամբ: Մեր կողմից, որպես բարդօքսիդային զգայուն նյութեր սինթեզելու և այդ թիրախների հիման վրա նանոթաղանթներ ստանալու հեռանկարային տեխնոլոգիական մեթոդներ ընտրվել և իրականացվել է, համապատասխանաբար ինքնատարածվող բարձրջերմաստիճանային սինթեզման (ԻԲՍ) ու լազերային գոլորշիացումով նստեցման (ԼԳՆ) եղանակները: Նշված ուղղությամբ անցած մի քանի տարիների ընթացքում կատարված աշխատանքների արդյունքում, սեփական ուժերով հավաքվել և փորձարկվել են տարբեր ջերմաստիճանային միջակայքերում աշխատող կերամիկական նմուշների թրծման վառարաններ, պատրաստվել են նախնական հումքի մեխանիկական ակտիվացման սարքեր: Գործում են նյութերի մանրացման մոլորակային և ցնցումային աղացները, նմուշների մեխանիկական հատման, հղկման և ողորկման սարքավորումները, էլեկտրաֆիզիկական ու սենսորային որոշ հատկությունների չափման սարքավորումները և այլն, ինչպես նաև տեխնոլոգիական գիծ` ինքնատարածվող բարձր ջերմաստիճանային սինթեզի եղանակով բարդ միացությունների սինթեզման համար: Աշխատանքներ են տարվում կատարելագործելու գոյություն ունեցող իոնային փոշենստեցման տեղակայանքը` նուրբ թաղանթներ ձևավորելու համար:
Վայր: 5-րդ մասնաշենք, Հեռ.: +374 10 52 49 35