Շփագիտություն
Լաբորատորիայի ղեկավար
Հիմնադրվել է 2011թ. փետրվարի 8-ին։
Հետազոտությունները նվիրված են մեքենամասերի և շփահանգույցների երկարակեցության ու հուսալիության տեսությանը և նախագծմանը, շփական ու հակաշփական նշանակության մեքենաշինական նյութերի գիտական սկզբունքների մշակմանը, շփման, մաշման և յուղման պրոցեսների մեխանիկային, շփագիտության տեսությանն ու կիրառություններին: Ավանդական մետաղական դեֆիցիտային մեքենամասերի փոխարեն կոմպոզիտային պոլիմերային նյութերի հիման վրա մեքենաների շփահանգույցների և մասերի հաշվարկման ու նախագծման ասպարեզում ծավալված բազմամյա նպատակամղված հետազոտությունների արդյունքների, մշակված հաշվարկային մեթոդների, ինչպես նաև կոմպոզիտային ինքնայուղվող նյութերի շփափոխազդեցության մեխանիկայի ուսումնասիրման և կիրառությունների ամբողջությունն ու ընդհանրացումն իրենից ներկայացնում է Հայաստանի Հանրապետությունում կոմպոզիտային նյութերի և դրանց հիման վրա շփահանգույցների ու մեքենամասերի ստեղծման գիտական նոր ուղղություն:
Առավել հեռանկարային ուղղություն է կոմպոզիտային ինքնայուղվող պոլիմերային նյութերի ստեղծումը տեղական հանքանյութերի, որպես լցանյութեր, կիրառությամբ: Մեքենամասերի ստեղծման և հետազոտման ասպարեզում զգալի արդյունքների կարելի է հասնել առանց թափոնների տեխնոլոգիայի և ոչ թանկարժեք հումքի, այդ թվում նաև հատուկ քիմիական մշակման ենթարկված, կիրառությամբ: Զգալի է շփման պայմաններում շարժման կայունության ապահովման տեսության զարգացումը: Մշակվում են հաստոցների, արտադրական ռոբոտների և այլ մեքենաների ուղղորդիչներում, ինչպես նաև արգելակային համակարգերում ու շփակցորդիչներում, շփական տատանումների հաշվարկային գնահատման և դրանց նվազեցման համալիր մեթոդներ: Առաջնակարգ կարևորության և պետական նշանակության խնդիր է արդյունավետ և միաժամանակ էկոլոգիապես մաքուր ասբեստազերծ շփական (արգելակային) կոմպոզիտային նյութերի ստեղծումը հանքանյութերի և այլ լցանյութերի օգտագործմամբ, մարդկանց առողջությանը վտանգավոր ասբեստի փոխարեն: Առաջիններից մեկը նախկին Խորհրդային միությունում մշակվել և ներդրվել է հեղինակային իրավունքներով արտոնագրված նոր ասբեստազերծ արգելակային կոճղակներ:
Միաժամանակ զգալի զարգացում է ստացել սահմանային յուղման պայմաններում շփափոխազդեցության տեսությունը: Մշակվում են քսուքայուղերի հակամաշվածքային հատկությունների կանխագուշակման շփագիտական բնութագիրմեթոդներ, քիմիական արտադրության թափոնների և արդյունաբերական յուղերի հիմքով կոմպոզիտային քսուքայուղային նյութեր և շփագիտական բարձր ցուցանիշներով հավելանյութեր: Ուսումնասիրվում են տեղական հանքանյութերի հիմքով պլաստիկ յուղման կոմպոզիտային նյութերի ստացման առանձնահատկությունները և շփագիտական բնութագրերի լավարկման մեթոդները: Աշխատանքներում ընդգրկված է ՀԱՊՀ Վանաձորի մասնաճյուղը:
Վայր: 17-րդ մասնաշենք, Հեռ.: +374 10 58 61 82