Ս․ թ․ հոկտեմբերի 1-ին Հայաստանի ազգային պոլիտեխնիկական համալսարանում տեղի ունեցավ տեղեկատվական հանդիպում Հայաստանում DAAD դասախոսներ Անեգրեթ Բայերի և Դանիել Լեպետիտի հետ։ Հանդիպումը կազմակերպել էր Միջազգային համագործակցության և դրամաշնորհային ծրագրերի վարչությունը։ Հյուրերին ողջունեց Վարչության պետի տեղակալ Անի Մամիկոնյանը, ով իր խոսքում, մասնավորապես նշեց․ «Այսօրվա մեր հանդիպման ընթացքում DAAD Գերմանական ակադեմիական փոխանակման ծառայության հայաստանյան գրասենյակի ներկայացուցիչները կտեղեկացնեն DAAD-ի կողմից առաջարկվող կրթաթոշակային հնարավորությունների մասին, որոնք նախատեսված են ուսանողների, բուհավարտների, հետազոտողների, գիտնականների դասախոսների և վարչական աշխատակիցների համար: ՀԱՊՀ-ն սերտորեն համագործակցում է մի շարք արտասահմանյան կազմակերպությունների, համալսարանների գիտական և հետազոտական կենտրոնների հետ: Այս առումով ողջունելի է ուսանողական համայնքի և համալսարանական համակազմի ակտիվ մասնակցությունը իրականացվող բազմաբնույթ կրթական, գիտական և հետազոտական ծրագրերին, որոնք միտված են ՀԱՊՀ ուսանողության ակադեմիական և վարչական անձնակազմի արհեստավարժության բարձրացմանը»։
Անեգրեթ Բայերը և Դանիել Լեպետիտը մեր համալսարանի ուսանողներին ներկայացրեցին Գերմանիայում ուսանելու և հետազոտական աշխատանքներ կատարելու հնարավորությունները, ուսանողների, հետազոտողների, գիտնականների դասախոսների և վարչական աշխատակիցների համար նախատեսված կրթաթոշակները:
Դասախոսները ծանոթացրեցին ծրագրին դիմելու ընթացակարգը:
Ուսանողները հնարավորություն ստացան DAAD-ի ներկայացուցիչներին ուղղել իրենց հետաքրքրող հարցերը և ստանալ սպառիչ պատասխաններ:
Հանդիպման ավարտին ուսանողներին բաժանվեցին տեղեկատվական գրքույկներ:
