Մյունխենի տեխնիկական համալսարանը (TUM) Եվրոպայի առաջատար բուհերից է, որը հայտնի է իր ինժեներական, տեխնոլոգիական և բնական գիտությունների ծրագրերով, ակտիվորեն համագործակցում է արդյունաբերության հետ և անցել է տեխնոլոգիական կլաստերի ձևավորման հաջողված ճանապարհ։
«Ակադեմիական քաղաք» հիմնադրամի աջակցությամբ և մասնակցությամբ «Technical University Munich International GmbH»-ի ծրագրի համակարգող տիկին Ջորջետա Աուկտուրը և ծրագրի ղեկավար տիկին Ալինա Լաուքը հանդիպումներ են ունեցել Հայաստանի ազգային պոլիտեխնիկական համալսարանի ուսանողների, վարչական, կրթական և գիտական ներկայացուցիչների հետ:
TUM-ի մասնագետները օժանդակություն են ցուցաբերում հետևյալ գլխավոր հարցերում.
- Ակադեմիական քաղաքի տեխնոլոգիական կլաստերի ձևավորման և առաջմղման մեթոդաբանության մշակում,
- Գիտահետազոտական ինստիտուտների և կրթական հաստատությունների սահուն ինտեգրում,
- Բուհ-հետազոտություն-արդյունաբերություն էկոհամակարգի ձևավորում և զարգացում:
Այս գործընթացը հիմք կհանդիսանա Հայաստանի Ակադեմիական քաղաքի տեխնոլոգիական կլաստերի արդյունավետ գործարկման համար:
Աշխատաժողովների ընթացքում հյուրերը ներկայացրել են TUM-ի կամպուսների բաշխվածությունը՝ շեշտելով օրգանական ներդաշնակեցումը արդյունաբերական ենթակառուցվածքների հետ: Բոլոր հանդիպումներում ծավալվել է ինտերակտիվ քննարկում: