«REnForce»-ի թիրախը մասնագիտական կրթության և ուսուցման (ՄԿՈՒ) համակարգի զարգացումն է՝ վերականգնվող էներգիայի ոլորտի շեշտադրմամբ: Ծրագրի շահառու են եվրոպական ու հայաստանյան 10 կրթական հաստատություններ:
ՎԵրականգնվող ու այլընտրանքային էներգետիկայի սրընթաց զարգացումը հանգեցրել է սպասարկող մասնագետների դեֆիցիտի, որը լրացնելու մտադրությամբ Եվրամիության Էրազմուս+ ծրագիրը նախաձեռնել է կրթական ծրագրերի մշակում ընտրված երկրներում:
Հիմնական նպատակները.
- Բարելավել Մասնագիտական կրթության և ուսուցման ծառայությունների մատուցման որակը և ժամանակի պահանջներին համապատասխանությունը՝ աշխատաշուկայում մասնագիտական հմտությունների պահանջվածությունը բարձրացնելու նպատակով:
- Վերանայել և լրամշակել Մասնագիտական կրթության և ուսուցման ուսումնական ծրագրերը՝ ոլորտի կարիքներին ավելի նպատակային արձագանքելու համար:
«REnForce»-ը նախատեսված է 3 տարվա համար: Այդ ընթացքում, ասում է ՀԱՊՀ հիմնադրամի Մինչբուհական կրթության գծով պրոռեկտոր Էլբակ Էլբակյանը, պետք է մշակվի կրթական չափորոշիչը, ստացվի լիցենզիա և իրականացվի ընդունելություն: Ուսումնառության ընթացքում զգալի դեր է հատկացվելու մասնավոր հատվածի հետ գործակցությանը. շրջանավարտը պրակտիկ գիտելիքը ձեռք է բերելու հենց ոլորտային բիզնեսի ձեռնարկություններում:
Էլբակ Էլբակյան. «Մեր նպատակը միջին մասնագիտական կրթական աստիճանում այլընտրանքային էներգետիկայի ոլորտի որակյալ մասնագետների պատրաստումն է: Եվ հիմա Քոլեջում կրթությունն իրականացնելու նպատակով ստեղծելու ենք նոր չափորոշիչը՝ հաշվի առնելով գործատուների պահանջները»:
Չափորոշչի մշակմանը զուգահեռ ստեղծվելու է այլընտրանքային էներգետիկայի լաբորատորիա, որից կարող են օգտվել նաև ծրագրի շահառու հայաստանյան այլ հաստատությունների ուսանողները:
Ռաֆֆի Քարամյան․ՀԱՊՀ քոլեջի տնօրեն. «Այլընտրանքային էներգետիկայի ոլորտում միջին մասնագիտական կրթություն տրամադրող որևէ հաստատություն դեռևս ուսուցում չի իրականացնում: Մենք պատրաստվում ենք դիմել Մասնագիտական Կրթության Ուսումնական Զարգացման Ազգային Կենտրոնին /ՄԿՈՒԶԱԿ/՝ փորձնական կրթական ծրագիր ներդնելու նպատակով»:
«REnForce»-ի ակնկալվող արդյունքներից են.
- ՄԿՈՒ գրավչության բարձրացումը Հայաստանի Հանրապետությունում՝ “ըստ պահանջի” (արևային էներգետիկա) ոլորտում հաջող աշխատանքի տեղավորման փորձի հանրայնացմամբ,
- Որակավորման պահանջներին ավելի լավ համապատասխանեցումը և ուսանողների աշխատանքի ընդունման մակարդակի բարձրացումը: