«Հայաստանի ազգային պոլիտեխնիկական համալսարան» հիմնադրամի Երևանի ավագ դպրոցի ուսուցիչները շարունակում են իրենց մասնագիտական զարգացման ուղին: Վերջերս դպրոցից թվով 79 մանկավարժներից 50%-ից ավելին՝ 33 ուսուցիչ, մասնակցել են կամավոր ատեստավորման ծրագրին և հաջողությամբ անցել այն:
Կամավոր ատեստավորումը հանրակրթական դպրոցներում ներդրված գործընթաց է, որի նպատակն է գնահատել ուսուցիչների առարկայական գիտելիքներն ու մասնագիտական կարողությունները՝ խթանելով նրանց մասնագիտական աճն ու աշխատավարձի բարելավումը: Ատեստավորման արդյունքում ուսուցչի դրույքաչափը սահմանվում է 200.000 ՀՀ դրամ, որին ավելանում է համապատասխան հավելավճար:
Նոր հնարավորություններ և հորիզոններ
Դպրոցի տնօրենի տեղակալ Նելլի Համբարձումյանն ընդգծում է «Կամավոր ատեստավորումը մեր ուսուցիչների համար ոչ միայն կարևոր հնարավորություն է՝ իրենց մասնագիտական գիտելիքներն ու հմտությունները վերահաստատելու, այլև նոր բարձունքներ նվաճելու։ Այս գործընթացը յուրօրինակ մարտահրավեր է, որը կարող է բացել զարգացման նոր դռներ։ Ես մեծ հավատ ունեմ մեր մանկավարժների ներուժին և խորհուրդ եմ տալիս բոլորին մասնակցել այս ծրագրին՝ վստահ լինելով, որ նրանք կարող են հաղթահարել այն և ձեռք բերել նոր մոտիվացիա իրենց մասնագիտական առօրյայում»։
Նշենք, որ 79 մանկավարժներից 10-ի առարկաների համար ատեստավորման գործընթաց նախատեսված չէ, ուստի նրանք չեն կարող մասնակցել։ Այս ցուցանիշը ևս վկայում է, որ դպրոցի ուսուցիչների մեծ մասը պատրաստակամ է շարունակել զարգանալ՝ ուսումնական գործընթացն ավելի արդյունավետ դարձնելու նպատակով։
Ատեստավորումն անցած ուսուցիչներից մեկը Ռուսաց լեզվի և գրականության ուսուցչուհի Ստելլա Առաքելյանն է՝ Արցախից: 35 տարի աշխատել է Ստեփանակերտում․ ՀԱՊՀ Ավագ դպրոցում մեկ տարի է: Գրանցել է 91 % ցուցանիշ: «Կամավոր ատեստավորումն ունի իր դրական և բացասական կողմերը:Դրականը լավ վարձատրվելու հնարավորությունն է, ինչը շատ ոգևորիչ է: Սակայն եթե խոսեմ, ոչ միայն իմ մասին, այլև ուրիշների, կարող եմ ասել, որ ոչ բոլոր ուսուցիչները կարող են հաղթահարել այդ թեստերը: Իմ կարծիքով պետք է տարանջատում լինի տարբեր տարիքային խմբերի հետ աշխատող ուսուցիչների միջև: Շատերի համար անհասկանալի է, ինչու տարրական, միջին և ավագ դպրոցներում աշխատող ուսուցիչների մասնագիտական որակները պետք է նույնը լինեն: Չէ որ տարբեր տարիքային խմբերում պահանջները տարբեր են»,- ասում է մանկավարժ Առաքելյանը:
Մաթեմատիկայի ուսուցիչ Արմեն Մկրտչյանը, ով մանկավարժությամբ զբաղվում է 1980 թվականից, ևս դրական է արտահայտվում ատեստավորման մասին։ Նա նշել է․ «Ատեստավորումը կարևոր քայլ է մասնագիտական աճի համար, թեև թեստերի ձևաչափը կարող է բարդ թվալ որոշ ուսուցիչների համար։ Այն հիմնականում գնահատում է առարկայական գիտելիքները, բայց ոչ մանկավարժական հմտությունները։ 1994-ին անցկացվել է առաջին ատեստավորումը և ես եղել եմ առաջիններից մեկը, ով մասնակցել է: Այն ժամանակ դա մանակավարժի աշխատավարձին ավելացնում էր 1000 ՀՀ դրամ: Այս անգամ գրանցել եմ 97% արդյունք, ստանում եմ 50% հավելավճար: 2012 թվականին՝ Պոլիտեխնիկի Ավագ դպրոց ընդունվելիս, արդեն ունեի տարակարգ», – նշում է Մկրտչյանը:
Ատեստավորման կարևորությունը
Կամավոր ատեստավորման համակարգի ներդրումը մեր կրթական համակարգում կարևոր հանգրվան է, որը նպաստում է ուսուցիչների մասնագիտական առաջընթացին և նրանց համար բացում է զարգացման նոր հորիզոններ։ Այս գործընթացը ոչ միայն հնարավորություն է տալիս ուսուցիչներին վերաարժևորելու իրենց գիտելիքներն ու հմտությունները, այլև խթանում է իրենց մասնագիտական աճն ու առաջընթացը։
ՀԱՊՀ հիմնադրամի Ավագ դպրոցի ուսուցիչների հաջողությունները այս ոլորտում վկայում են կրթության բարձր որակի, դպրոցի ամուր արժեքների և հաստատված ստանդարտների մասին։ Սա հստակ ցույց է տալիս, որ դպրոցն արժանապատվորեն առաջնորդվում է կրթության գերազանցության իր առաքելությամբ՝ տալով ուսուցիչներին լավագույն պայմանները և հնարավորությունները։