Հետազոտական աշխատանքներն այս տարի նվիրված էին հանքարդյունաբերության հոսքաջրերի մաքրմանը, երկրաջերմային էներգիայի և արժեքավոր մետաղների կորզմանը, դեղագործության ոլորտում անալիզի նոր հնարավորություններին, սիլիցիում օրգանական միացությունների գործնական կիրառությանը, կլիմայի փոփոխություններով պայմանավորված ազդեցությունների մեղմման տեխնոլոգիական լուծումներին:
Զեկուցումների հեղինակների համար ոգևորիչ էր քննարկումների նկատմամբ նման հետաքրքրությունը. մասնակցում էին ոչ միայն Պոլիտեխնիկի հետազոտողներն ու ուսանողները, այլև գիտնականներ ԵՊՀ-ից, Գիտությունների ազգային ակադեմիայից, երկրի առաջատար արդյունաբերական և արտադրական ձեռնարկություններից: Գիտաժողովը գրավել էր նաև բարձր տեխնոլոգիական սարքավորումներ արտադրող հեղինակավոր միջազգային բիզնեսի ուշադրությունը, որոնց հայաստանյան գրասենյակները մասնագետներին են ներկայացրել քիմիական և բնապահպանական անալիտիկ սարքավորումների նորագույն լուծումներն ու նվաճումները:
Արտաշես Թադևոսյան, Քիմիական տեխնոլոգիաների, բնապահպանության և կենսագործունեության անվտանգության ամբիոնի պրոֆեսոր. «Գիտաժողովի հիմնական նպատակն է տարվա ընթացքում կատարված աշխատանքները, բացթողումներն ու անելիքը ներկայացնելը: Սա հնարավորությունների հարթակ է պրոֆեսորադասախոսական անձնակազմի, ասպիրանտների, մագիստրոսների և ուսանողների համար՝ գիտական զեկույցներով ներկայացնելու իրենց մշակումները, նախագծերը»:
Քիմիական տեխնոլոգիաների, բնապահպանության և կենսագործունեության անվտանգության ամբիոնի աշխատակիցները նշում են, որ ՀԱՊՀ ռեկտորի՝ քիմիական տեխնոլոգիաների զարգացման ծրագրերը թարմ շունչ և կարևորություն են հաղորդել իրականացվող գիտահետազոտական աշխատանքներին: Դա հատկապես նկատելի է երիտասարդ գիտաշխատողների նախաձեռնություններում: