Գենտի համալսարանը «Eureast» հարթակի միջոցով հայտարարում է կարճաժամկետ կրթաթոշակի հնարավորություն ասպիրանտուրայում սովորող ուսանողների համար: «Eureast» հարթակը Գենտի համալսարանի վեց տարածաշրջանային հարթակներից մեկն է, որի նպատակն է համակարգել և խթանել կրթության և հետազոտության համագործակցությունը Արևելյան Եվրոպայի և Եվրասիայի հետ:
«Eureast» հարթակի 2025-2026թթ.-ի կանչը նախատեսված է՝ գիտության, ճարտարագիտության և բիոինժեներիայի ֆակուլտետներում սովորող ասպիրանտուրայի ուսանողների համար:
Կրթաթոշակի շրջանակում ասպիրանտները կարող են իրենց հետազոտական աշխատանքներն իրականացնել Գենտի համալսարանում մեկից երեք ամիս տևողությամբ: Շարժունության ժամանակահատվածն ընդգրկում է 2025 թվականի մարտից մինչև 2026 թվականի դեկտեմբեր ամիսները, բացառելով ամառային ամսիների շարժունությունը:
Այցելող գիտնականները պարտավոր են վարել առնվազն մեկ դասախոսություն կամ սեմինար (անգլերեն լեզվով) գործընկեր հետազոտողների և ուսանողների համար, ինչպես նաև պետք է գտնեն իրենց թեմային համապատասխան հետազոտական ղեկավար Գենտի համալսարանում, ով կհամաձայնի ղեկավարել հետազոտական աշխատանքը: Ակնկալվում է, որ շարժունության ավարտին մասնակիցը կներկայացնի գործունեության կարճ հաշվետվություն՝ նշելով կրթաթոշակի արդյունքը կամ արդյունքները:
Ընտրության ընթացակարգում հաշվի են առնվելու հետևյալ չափանիշները.
- Թեկնածուի փորձառությունը
- Առաջարկվող հետազոտության ընդհանուր որակը
- Հետազոտության պլանի մոտիվացիան և իրագործելիությունը
- Հետազոտության արժեքն ու կայունությունը
Նախորդ տարիների դրամաշնորհառուները իրավունք չունեն մասնակցելու այս կանչին:
Դիմելու համար անհրաժեշտ է՝
- Անձնական տեղեկատվություն
- Ուղեկցող նամակ, որտեղ մասնակիցը պետք է նշի շարժության շրջանը, հետազոտական ուղղությունը, և թե ինչ ավելացված արժեք կունենա Գենտի համալսարանում հետազոտական աշխատանքներից հետո:
- Հետազոտական պլան
- Ինքնակենսագրություն /առավելագույնը երկու էջ/
Դիմումը պետք է ներկայացվի [email protected] էլեկտրոնային փոստի միջոցով մեկ PDF ֆայլով ոչ ուշ, քան 2024 թվականի դեկտեմբերի 1-ը, Կենտրոնական Եվրոպայի ժամանակով 23:59-ին:
Կրթաթոշակի շրջանակում տրամադրվում է միանվագ 2750 եվրո դրամաշնորհ, որը նախատեսված է ճանապարհորդության և կեցության ծախսերի համար:
Ընտրության արդյունքների մասին մասնակիցները կտեղեկացվեն 2024 թվականի դեկտեմբերի 13-ին:
Հավելյալ տեղեկատվության, հայտադիմումի լրացմանել և դիմելու կարգին ծանոթանալու համար անհրաժեշտ է անցնել կից հղումով: