2023թվականին ԱՊՀ երկրներում ռուսաց լեզվի, որպես ազգամիջյան հաղորդակցման լեզվի, տարվա միջոցառումների շրջանակում հայաստանյան տարբեր բուհերում և կրթօջախներում անցկացվել են ռուսերենին նվիրված մի շարք միջոցառումներ։ Միջոցառումների ծրագրից դուրս չի մնացել նաև Հայաստանի ազգային պոլիտեխնիկական համալսարանը։ Կարևորելով ռուսաց լեզվի, գրականության, մշակույթի ուսումնասիրությունը, զարգացումը և տարածումը Հայաստանում, ՀԱՊՀ Ռուսաց լեզվի ամբիոնում՝ ի դեմ ամբիոնի վարիչ Լուիզա Սարգսյանի, կազմակերպվել էր «Գլոբալիզացիայի ազդեցությունը ռուսաց լեզվի վրա» խորագրով գիտաժողով։
Գիտաժողովին մասնակցում էին նաև այլ բուհերի ներկայացուցիչներ, մասնավորապես, Խ․ Աբովյանի անվան հայկական պետական մանկավարժական համալսարանի Ռուսաց լեզվի և դրա դասավանդման մեթոդիկայի ամբիոնի վարիչ, բան. գիտ. թեկնածու, մանկավարժական գիտությունների դոկտոր, պրոֆեսոր Նաիրա Դալյանը, Վ․ Բրյուսովի անվան պետական համալսարանի անգլերենի ամբիոնի դոցենտ Արմինե Վահանյանը և ոչ միայն։ Մասնակիցները ոլորտի խնդիրներին անդրադարձան գիտական տեսանկյունից, ուղղորդեցին քննարկվող մի շարք հարցերի պատասխաններ գտնելու հարցում։
Ըստ Լուիզա Սարգսյանի առաջիկա տարվա ընթացքում ամբիոնում կիրականացվեն բազմաթիվ միջոցառումներ, որոնք կնվիրվեն Պոլիտեխնիկի 90-ամյակին և մեկնարկը տալիս են այս միջոցառմամբ։
Գիտաժողովի մասնակիցները հանդես եկան զեկուցումներով, քննարկեցին հարցեր, որոնք վերաբերում էին գլոբալիզացիայի ազդեցությանը ռուսաց լեզվի վրա, հետխորհրդային տարածքում լեզվական քաղաքականությանը և մի շարք այլ հարցերի։ Տարբեր բուհերի մասնագետները քննարկեցին նաև փոփոխվող աշխարհում դինամիկ զարգացող լեզվի դերը և այն, թե ինչպես են ժամանակակից տրամադրությունները փոխում լեզվամտածողությունը, ազդում մարդկանց կենսակերպի և լեզվի վրա։
