«Համաչափության, գեղեցկության և առողջության համար պահանջվում է զբաղվել ոչ միայն կրթությամբ, գիտությամբ և արվեստով, այլև ֆիզիկական վարժություններով, մարմնամարզությամբ»․ Պլատոնի այս միտքը անխախտ նշաձող է նաև Պոլիտեխնիկում:
Հայաստանի ուժային եռամարտի հավաքականը՝ ֆեդերացիայի նախագահ, հավաքականի գլխավոր մարզիչ, ՀԱՊՀ Ֆիզիկական դաստիարակության և սպորտի ամբիոնի դոցենտ Գագիկ Սարոյանի գլխավորությամբ, Լեհաստանի Շեդլեց քաղաքում մասնակցել է XPC վարկածով փաուերլիֆտինգի աշխարհի գավաթի խաղարկությանը: Արդյունքը՝ 16 ոսկե մեդալ: Հայաստանի թիմի կազմում ընդգրկված է եղել 18 մարզիկ՝ պատանիներ, երիտասարդներ և մեծահասակներ:
Թիմային հաշվարկով ևս Հայաստանի հավաքականն առաջին տեղն է զբաղեցրել:
Աշխարհի գավաթի խաղարկությանը 15 երկրի շուրջ 600 մարզիկ է մասնակցել ինչպես ուժային եռամարտ, այնպես էլ սեղմում-պառկած վարժությունից: Վետերանների հաշվարկում մասնակցել է նաև Գագիկ Սարոյանը՝ զբաղեցնելով առաջին տեղը։
Այս մարզաձևում հայ մարզիկները տարիներ շարունակ ուժեղագույնների շարքում են և հաճախ իրենք են թելադրում այս կամ այն մրցաշարի ընթացքն ու փայլուն հաղթանակներ պարգևում մարզասերներին։ XPC վարկածով փաուերլիֆտինգի աշխարհի գավաթի այս խաղարկությունը ևս բացառություն չէր․ հայ մարզիկներ Աշոտ Պետրոսյանը և Արա Խաչատրյանը գրանցեցին ռեկորդ։ Մեծահասակների պայքարում գյումրեցի Արա Խաչատրյանը (90 կգ) աշխարհի ռեկորդով դարձավ գավաթի խաղարկության բացարձակ հաղթող և արժանացավ ոսկե մեդալի: Պատանիների պայքարում էլ գավաթի խաղարկության բացարձակ հաղթող ճանաչվեց Աշոտ Պետրոսյանը (90 կգ):
Նման հաղթանակները, սակայն, հեշտ չեն տրվում․ «Մեր մարզիկները ամբողջ տարին ամենայն լրջությամբ ու ջանասիրաբար են անցկացրել մարզումները, ինչի արդյունքն ակնհայտ էր՝ հաղթական ավարտ»,-նշում է Պոլիտեխնիկի դոցենտ Գագիկ Սարոյանը։
Հայաստանի ուժային եռամարտի ֆեդերացիայի նախագահը հավաքականի հաջողության գրավականը համարում է միասնությունը և հավատը սեփական ուժերի հանդեպ։ Նա վստահ է, որ մեր մարզիկները հետագայում նույնպես հաջողություններ կունենան, իսկ այդ ուղղությամբ արդեն տարվում են աշխատանքներ։