Հայաստանի ազգային պոլիտեխնիկական համալսարանում շատ են այն ուսանողները, ովքեր իրենց ուսումնառությունն անցկացրել և այժմ էլ ուսում են ստանում արտասահմանյան բազմաթիվ բուհերում: Պոլիտեխնիկն ակտիվորեն գործակցում է Հայաստանում գործող միջազգային կրթական կազմակերպությունների հետ, մասնավորապես, Գերմանական ակադեմիական փոխանակության ծառայության գրասենյակի (DAAD) հետ:
Կառույցը հնարավորություն է ընձեռում հայ ուսանողներին ուսումը շարունակելու, կարճաժամկետ ուսումնական այցեր կատարելու արտասահմանյան բուհեր, դասախոսներին` հետազոտական աշխատանքներ կատարել կամ վերապատրաստվել արտասահմանում:
Այս գործակցության շրջանակում Պոլիտեխնիկը հյուրընկալել էր Գերմանական ակադեմիական փոխանակության ծառայության գրասենյակի (DAAD) ներկայացուցիչ Արևիկ Հարությունյանին։
Հանդիպումը նպատակ ուներ բարձրացնել ուսանողների տեղեկացվածության մակարդակը և խթանել նրանց ներգրավվածությունը միջազգային ծրագրերում, դասախոսական կազմին իրազեկել կրթական, հետազոտական, դրամաշնորհային և այլ ծրագրերի մասին:
Հանդիպումը կազմակերպել էր ՀԱՊՀ Միջազգային հարաբերությունների վարչությունը:
Միջոցառումը բակալավրիատի 4-րդ և մագիստրատուրայի 2-րդ կուրսի ուսանողների համար էր, որոնք ցանկության դեպքում կարող են ևս մեկ մագիստրոսական կրթական ծրագիր անցնել Գերմանիայում։
DAAD-ի մագիստրոսական կրթաթոշակային ծրագիրն արդեն բաց է, և դիմելու վերջնաժամկետը հոկտեմբերի 28-ն է:
Հանդիպման ընթացքում համառոտ նշվեցին գերմանական կրթահամակարգի մի շարք առավելություններ, որոնք առավել գրավիչ են դարձնում գերմանական բարձրագույն ուսումնական հաստատությունները:
Քննարկվեցին նաև մագիստրոսական կրթաթոշակին դիմելու ընթացակարգերը։