Հայաստանի ազգային պոլիտեխնիկական համալսարանի մեդիա մասնագետ Նելլի Չիբուխչյանը Նիդերլանդների Թագավորության Հաագա քաղաքում մասնակցել է «Respect International West-East Bridges» հիմնադրամի կազմակերպած «Hug The Hague. Youth Involvement in Democratic Institutions» ծրագրին:
Մասնակիցները ինը երկրից են եղել՝ Հայաստան, Վրաստան, Մոլդովա, Ուկրաինա, Իսպանիա, Լատվիա, Գերմանիա, Հունաստան, Նիդերլանդներ:
Ծրագրի հիմնական նպատակը կրթության կազմակերպման գործընթացների մշակումն էր և ոչ ֆորմալ կրթության ներմուծումը բարձրագույն ուսումնական հաստատություններ։
Մասնակից երկրները ներկայացրել են իրենց կրթական ոլորտում առկա խնդիրները և առաջարկվող լուծումները: Եվրոպական երկրների կրթական համակարգում ոչ ֆորմալ կրթությունը կազմում է ուսումնական պրոցեսի 30 տոկոսը:
Քննարկումներից հետո Նելլի Չիբուխչյանը առանձնացրել է այն հնարավոր տարբերակները որոնք կարող են կիրառվել տեխնոլոգիական բուհում: Ազգային թիմերը ներկայացրել են հստակ աշխատանքային պլան, որը պետք է իրականացնեն իրենց երկրներում՝ նախարարության հետ համագործակցությամբ:
Ծրագրի վերջին օրը, ներկայացնելով Հայաստանի ազգային պոլիտեխնիկական համալսարանը, Նելլի Չիբուխչյանը խոսել է ճգնաժամային իրավիճակներում կրթության կարևորության և վերջինիս կազմակերպման այլընտրանքային տարբերակների մասին։
Ծրագրին մասնակցում էին 4 եվրոպական տեխնոլոգիական բուհերի ուսանողներ, որոնք մեծ հետաքրքրություն են ունեցել Պոլիտեխնիկական համալսարանում առկա բացառիկ լաբորատորիաների և կրթության կազմակերպման ձևերի հանդեպ:
Ծրագրի շրջանակներում հայկական պատվիրակությունը հանդիպումներ է ունեցել Նիդերլանդներում Հայաստանի դեսպան Տիգրան Բալայանի և Հայաստանում Նիդերլանդների դեսպան Նիկոլաս Յակոբ Սխերմերսի հետ։