Հունիսի 22-ը քիմիական, կենսատեխնոլոգիական և բնապահպանական տեխնոլոգիաների կրթության կազմակերպման մեծ երախտավոր, ՀԱՊՀ Պատվավոր պրոֆեսոր Կարապետ Թահմազյանի հիշատակի օրն է:
Լեռնամետալուրգիայի և քիմիական տեխնոլոգիաների ինստիտուտի Ընդհանուր քիմիայի և քիմիական տեխնոլոգիաների ամբիոնի ընդլայնված նիստի առաջին հարցը նվիրված էր հենց պրոֆեսորի հիշատակին: Նիստին ներկա էին Լեռնամետալուրգիայի և քիմիական տեխնոլոգիաների ինստիտուտի տնօրեն Արմեն Հովհաննիսյանը, 1988-2006թթ. ՀԱՊՀ-ի ռեկտոր, ակադեմիկոս Յուրի Սարգսյանը, երկարամյա պրոռեկտորներ Միքայել Հարությունյանն ու Սուրեն Աղբալյանը, պրոռեկտոր Արեգ Գրիգորյանը, Գորիսի պետական համալսարանի ռեկտոր Վանդունցը, Նաիրիտ ԳԱՄ-ի գլխավոր տնօրեն Գ․Մարգարյանը, ՀՀ Ազգային ժողովի պատգամավոր, ՔՏ ու ԲՃ/քիմաիական տեխնոլոգիաների և բնապահապանության ճարտարագիտության/ ֆակուլտետի շրջանավարտ Ալխազ Ղազարյանը, ՀՀ հանրագիտարանի գլխավոր խմբագիր, պրոֆեսոր Հ․Այվազյանը, համալսարանական բազմաթիվ գործընկերներ, այլ բուհերից ու գիտական կենտրոններից քիմիկոս գործընկերներ, Պոլիտեխնիկի քիմիականն ավարտած բազմաթիվ շրջանավարտներ:
Բացման խոսքում ամբիոնի վարիչ պրոֆեսոր Գագիկ Թորոսյանը, նշելով Թահմազյանի հիշատակը, ժողովականներին հիշեցրեց հանրապետությունում «քիմիկոսի» մասնագիտական-կրթական ուղղվածության ներկայիս խիստ անկումային վիճակը: Նա, ինչպես նաև հաջորդ ելույթ ունեցողները, նշեցին հատկապես այն իրողությունը, որ Երկրում շարունակվում են զարգանալ քիմիական ուղղվածության արտադրական, ավելին, ռազմական արդյունաբերության ուղղությունները, կա մասնագետների պահանջարկի իրատեսական խնդիր:
Ամբիոնի վարիչն իր ելույթում կարևորեց նաև փաստը, որ նման խնդիր եղել է անցյալ դարի 90-ականներին, երբ օրվա հոբելյարը, Պոլիտեխնիկի այն ժամանակվա ղեկավարության ու պատկան մարմինների գործնական աջակցության շնորհիվ, կարողացավ վերապրեցնել Ֆակուլտետը: Ճգնաժամի լուծման արդյունքն արտացոլվեց հետագա 20 տարիներին ֆակուլտետի նոր ծաղկմամբ: Սկսեցին զարգանալ ուսումնա-գործնական աշխատանքներն ու դրա շնորհիվ Երկիրն ունեցավ այսօրվա քիմիական, կենսաքիմիական, դեղագործական, բնապահպանական տեխնոլոգիաների հիանալի մասնագետներին, արտադրության և կրթական համակարգի ղեկավարներին ու ակտիվ մասնակիցներին:
Թահմազյանին նվիրված խոսքով հանդես եկան Յուրի Սարգսյանը, Գ․ Հովհաննիսյանը, Արտաշես Թադևոսյանը և մյուս ներկաները: ՀՀ ԱԺ պատգամավոր Ա․ Ղազարյանն առաջարկեց համատեղ քննարկել այդ հարցը Խորհրդարանի համապատախան հանձնաժողվի նիստում՝ ներկայացնելով իրատեսական ծրագիր ՀԱՊՀ-ում սույն մասնագիտական ուղղության ուսումնական խնդիրների նորովի կայացման համար:
Հնչեցին նաև ողջույններ արտասհմանում բնակվող ֆակուլտետի բազմաթիվ աշխատակիցներից ու շրջանավարտներից: Նամակ էր ուղարկել նաև Կանադայում բնակվող ՀՊՃՀ ՔՏ և ԲՃ ամբիոնի դոցենտ Ալիսա Կալպակյանը. «Քիմիականի բազմաթիվ երախտավորներիս համար, այդ թվում դուստրերիս՝ Խաչատրյան Հասմիկ և Լուսինե, Կարապետ Ծերունի Թահմազյանը եղել է որպես նպատակասլաց, աշխատասեր, կարգապահ, մեծահոգի, պատրաստակամ, օրինակելի մարդ և ընդմիշտ կմնա այդպիսին մեր հիշողություններում»: