Այսօր Հայաստանի ազգային պոլիտեխնիկական համալսարանում Արցախի Հանրապետության նախկին պետական նախարար, նախկին վարչապետ Արայիկ Վլադիմիրի Հարությունյանը հանդիպում ունեցավ ուսանողների հետ:
Հանդիպմանը ներկա էին ռեկտոր Ոստանիկ Մարուխյանը, ռեկտորի տեղակալ Գոռ Վարդանյանը, Միջազգային համագործակցության և կրթական բարեփոխումների գծով պրոռեկտոր Ռուբեն Աղգաշյանը, ՈւԽ նախագահ Գևորգ Հարությունյանը, ուսանողական համակազմի ներկայացուցիչներ:
Ողջունելով ուսանողներին՝ Ա. Հարությունյանն ասաց, որ արդեն հանդիպել է մի շարք բուհերում սովորող ուսանողների հետ, և հերթական հանդիպումը Պոլիտեխնիկում է: Հանդիպման նպատակն էր՝ ներկայացնել Արցախի զարգացման տեմպերը վերջին տարիներին և խրախուսել ուսանողությանը, որպեսզի իրենց ձեռք բերած փորձը, գիտելիքները ներդնեն Արցախի զարգացմանն ուղղված ծրագրերին, խնդիրների լուծմանը, ինչպես նաև իրենց ոլորտում լինեն մրցունակ մասնագետներ:
Ա. Հարությունյանը նշեց, որ Արցախի և Հայաստանի առջև ծառացած հիմնական մարտահրավերների հաղթահարումը պայմանավորված է տնտեսական զարգացման շարունակական ապահովմամբ: Նրա խոսքով՝ երբ ստանձնեց գործադիր իշխանության ղեկավարի պաշտոնը, հինգ հիմնական առաջնահերթություն է դրել իր առջև՝ ապահովել հանրապետության պարենային և էներգետիկ անվտանգությունը, զարգացնել հանքարդյունաբերությանը, տեղեկատվական տեխնոլոգիաների, զբոսաշրջության ուղղությունները՝ զուգահեռաբար ապահովելով տնտեսական աճի բարձր տեմպեր:
«2007 թվականին հանրապետության համախառն ներքին արդյունքը կազմում էր 70 մլրդ դրամ: Թե՛ պարենային և թե՛ էներգետիկ անվտանգության առումներով լուրջ խնդիրներ կային: Հետևողական աշխատանքի շնորհիվ մեզ հաջողվեց բեկում մտցնել տնտեսության զարգացման ու կառուցվածքի փոփոխության հարցում, և համախառն ներքին արդյունքն ավելի քան քառապատկել: Պետական բյուջեն 2007 թվականին եղել է 32 միլիարդ դրամ, այս տարի կազմում է 112 միլիարդ դրամ: Տնտեսության զարգացման շնորհիվ մենք կարողացել ենք զգալիորեն կրճատել գործազրկությունը, կառուցել մեծ թվով դպրոցական և նախադպրոցական շենքեր, ստեղծագործական կենտրոններ, ճանապարհներ ու հանրային նշանակության բազմաթիվ այլ ծրագրեր իրականացնել: Մի քանի անգամ ավելացել է սոցիալական ծրագրերի թիվը: Այս ամենն ուղղված է կյանքի որակի բարելավմանը» – նշեց Ա. Հարությունյանը:
Գյուղատնտեսության ոլորտում, ըստ Ա. Հարությունյանի, ստեղծված են հիմնական բարենպաստ նախադրյալները, և տարեցտարի ավելանում է գյուղատնտեսական համախառն արտադրանքը: «Արդեն ունենք գյուղատնտեսության զարգացման հայեցակարգ, դրանից բխող ծրագրեր, ինչպես նաև փորձ, որը թույլ է տալիս համարձակ հայտարարել, որ կառավարության կողմից ընդունված ծրագիրը խիստ իրատեսական է»,- նշեց նա:
Անդրադառնալով էներգետիկայի ոլորտին՝ նա նշել է, որ ոլորտը անվտանգային առումով մեծ կարևորություն ունի, ինչը պայմանավորված է արտաքին միջավայրից բխող մի շարք գործոններով: «Էներգետիկ անվտանգության ապահովման առումով, ելնելով էկոլոգիական խնդիրներից և ռեսուրսների ճիշտ կառավարման տեսանկյունից, մենք նախընտրեցինք հիդրոէլեկտրակայանների կառուցումը: Այս տարի էլեկտրաէներգիայի արտադրությունն արդեն գերազանցել է ներքին սպառման ծավալները, և առաջիկա տարիներին այն պետք է հասցնել մինչև 1 միլիարդ կՎտ/ժ արտադրության: Այդ պարագայում, ըստ մասնագիտական հաշվարկի, հնարավորություն կլինի աստիճանաբար հրաժարվել բենզինից, դիզվառելիքից և գազից՝ Արցախը էներգետիկ առումով ամբողջությամբ դարձնելով ինքնաբավ ու անվտանգ»:
Խոսելով Արցախի տնտեսության զարգացման հեռանկարների և ուղղությունների մասին՝ Ա. Հարությունյանը ընդգծեց, որ պետք է շարունակել պահպանել տնտեսական աճի տեմպերը՝ պարզաբանելով և մանրամասնելով, թե ինչպես է նախատեսվում այդ ցուցանիշներին հասնել և ապահովել այդ արդյունքները:
Հանդիպման ընթացքում Ա. Հարությունյանը պատասխանեց ուսանողների հարցերին, որոնք վերաբերում էին տնտեսության տարբեր ոլորտներին և դրանց զարգացման հեռանկարներին:
