ՀՀ նախագահ Արմեն Սարգսյանը հուլիսի 3-ին այցելեց Հայաստանի ազգային պոլիտեխնիկական համալսարան: Նախագահը շրջայց կատարեց Օդային ռոբոտատեխնիկայի ուսումնա-հետազոտական նորաբաց կենտրոնում, որտեղ ուսանողները ցուցադրեցին անօդաչու թռչող սարքերը և դրանց հնարավորությունները:
Այնուհետև ՀՀ նախագահը ծանոթացավ «Տաշիր Կասկադ հոլդինգ» և «Շնայդեր Էլեկտրիկ-Տաշիր» գերազանցության կենտրոնների աշխատանքին: Ուսանողները նախագահին ներկայացրեցին էլեկտրաէներգետիկական համակարգերի կառավարման սարքերը, ինչպես նաև հաշվիչները, ստուգիչ և չափիչ սարքերը:
Հայաստանի ազգային ինժեներական լաբորատորիայում նախագահին ծանոթացրին արդի լաբորատոր սարքավորումները ռոբոտաշինության, կապի և հեռահաղորդակցման ոլորտներում:
Լրագրողների հետ զրույցում նախագահը նշեց, որ Հայաստանում կան այն հիմնական ուղղությունները, որոնցով կարելի է ապագա կառուցել:
«Ես առիթ ունեցա տեսնելու այն, ինչ մտածում և երազում ենք մի քանի տարի անց Հայաստանի մասին: Այսօր Պոլիտեխնիկական համալսարանի տարածքում դրա բոլոր նախադրյալները կան: Կան ուսանողներ, ովքեր ճիշտ մասնագիտություն և ճիշտ գիտելիքներ են ստանում, կա դասախոսական կազմ, ովքեր ուսանողներին պատրաստում են, և կան այս շենքում խոշոր միջազգային կազմակերպություններ: Ուսանողները զբաղված են լուրջ կրթական պրոցեսով և գիտահետազոտական աշխատանքով: Այստեղ այցելելով՝ տեսնում ես, որ երիտասարդների մի մեծ զանգված ցանկություն ունի ինժեներական ժամանակակից մասնագիտություն ստանալ, որ Հայաստանում կան այն հիմնական ուղղությունները, որոնցով կարելի է ապագա կառուցել: Հետևաբար, սա ինձ համար ինչ-որ իմաստով փոքրիկ այցելություն էր դեպի ապագա»,- ասաց Արմեն Սարգսյանը:
Նա նշեց, որ որպես պաշտոնյա և անհատ, ով ունի որոշակի արտաքին կապեր միջազգային կազմակերպություններում, պատրաստ է աջակցել ուսանողներին:
«Մի քանի գաղափարի մասին խոսեցին ուսանողները, և իմ խնդիրն է լինելու օգնել և աջակցել նրանց, որպեսզի նրանք իրենց առջև դրված նպատակներին ժամանակին հասնեն, և մեր երկիրը դառնա այնպիսին, ինչպիսի երկրի մասին երազում ենք»,- եզրափակեց Սարգսյանը: